#يوميات_موظفة_جزائرية

نكون مريحة نخدم في أمان الله؛ مقابلة الميكرو والميكرو مقابل الباب؛ يدخل أخينا يطلق السلام ويقف وهو داير مسافة الأمان؛ ويمد يدو من بعيد حتى لا يلامس يدي الناعمتين وتقع الفتنة؛ يعطيني الفلاش ديسك باش نطبعلو عفايس وانا نمد في يدي من فوق الميكرو باش نحكمو بصعوبة تقول عليا مادة يدي نطلب النجاة في راس الجبل كيما في الأفلام.. نفتح الفلاش ديسك ونقولو واش من دوسي نطبعهولك؛ يقلي واش من دوسي؟ آه نسيت؛ اسمحيلي الدعوة ملخبطة في الفلاش ديسك تاعي؛ شوفي تما واحد دوسي مكتوب فيه إرسالية؛ انا نحوس ؛عينيا يلعبو بين الدواسا؛ هاذي تصاور ؛هاذي قرآن؛ هاذي كتب دينية؛هذا كتاب ليلة الدخلة على الطريقة الشرعية؛ هاذي فيديوهات؛ هاذي رقية؛ والارسالية ماكانش... نقولو اسمحلي بصح ماكانش؛ اديه زيد شوف بالاك في بالك درت كوبي كولي وانت غلطت في كاش حاجة...يقلي هاذوك تصاور ولادي... نشوف فيه ونقولو آه؟ يقولي هاذوك لي فالفلاش ديسك... نولي نقلو آه اسمحلي "في قلبي وانا واش راحلي ادي فلاش ديسك تاعك وروح ياك القصرة مع النساء الاجنبيات لا تجوز" ونلعب روحي نضرب طلة و طبعاً نزيد كلمة الله يبارك... "في قلبي ياااع حاشا خليقة ربي" واش راح نقول مثلاً؛ كاش نهار شفتو واحد ينعت لواحد تصويرة ولدو والآخر يقولو ماشي مليح؟ لازم تقول الله يبارك وتجيبها برنة الإعجاب كي شغل en français.. Ooooh il est mignon  ... يقلي يبارك فيك ولعقوبة ليك الذرية الصالحة "اممم شكراً اخي "... في بالي خلاص راح يروح؛ نجي نجبد الفلاش ديسك؛ نحس بحاجة قدامي؛ يا إلهي أخينا دار ورا البيرو جا عند راسي؛ أين مسافة الأمان واااع  يهبط عليا وعلى الميكرو؛ يحط صبعو على l'écran ؛يقلي ادخلي تشوفي في هاذ التصويرة؛ انا نكليكي " واااع ماهذا يا إلهي؛ ماهذا الكائن؟ وهل هو مخلوق حي؟" ونلعبها عاااقلة ونقولو هذا الكبير؟ يقلي وهو نافخ روحو هذا هو البدري تاعي" يااو بالعقل على روحك؛ واش تنفخ تقول انت السلطان و هذا ولي العهد مثلاً "؛ وانا عاااقلة نقولو الله يبارك؛ واش اسمو؟... ركزو مع الاسم : عمر مقيم ونعيطولو ابو القعقاع..." واااع واطيز ذيس! ؟" ويكمل يقولي هههه عمر على اسم بابا الله يرحمو "االله يرحمو" مزية جبت ولد قبل خويا طفرت فيه انا لي صلحتلي نسمي ولدي باسم الشايب الله يرحمو" اه وعلاش هذا سباق عائلي في إنجاب ولي العهد ومنحه اسم الخليفة مثلاً "  ومقيم باش يكون مقيم الصلاة" لالا تهنى رح يكون مقيم في الجزائر ومقيم للصلاة غير في رمضان" ونعيطولو ابو القعقاع نسبة للبطل لي دار عملية انتحارية... "وااااااع يا إلهي"... الله يبارك الله يبارك؛ وقفة ترحم على البراءة... هاذ المرة حسيت حاجة مست يدي؛ واااع حط يدو على يدي وانا شادة la souris زعمة حاب يفهمني بلي مادارهاش بالعاني وراه غير رح يكليكي يوريلي الصورة الثانية... هنااااا قادرناك ماحبيت تقادر ؛ خطيناك ماحبيت تخطينا ؛ تحكي وسمعناك؛ مسافة الأمان ووحدك تخطيتها؛ اما يدي الناعمتين فلا وابدا ألف لا... إنها الحرب ونوقف... قتلو واش الثاني اسمو بن لادن ولا البغدادي؛ أيا أدي قوادتك وطير؛ والله نشكي بيك يا خبيث يا إرهابي؛ جايب خلايا نائمة؛ ديجا انت ماشي شباب واش توريلي في أولادك ماشي شابين كيفك ويا درا لي جابتهم كيفاش ؛ ياك حتى القطط تجيب ولاد؛ طير الله يعطيك طيارة....
المهم قالك سمعو دوي انفجار في service personnel وكانوا شهود عيان في الكولوار نصهم يضحك والنص الثاني يستغفر ويقول هذا كامل بوتفليقة عطا الحق للنسا؛ أما المعنية بالأمر فقد تكهرب شعرها وتحول شكلها إلى بختة الوهرانية منين تدابز مع التواتي تاع الحاج لخضر مول العمارة كثرو عليه الهدارة أهو أهو أهو.... و عندها تورمات بسيطة لأنها ضربت الأخ بالكرسي ولاسوري و الماشينة تاع السكوتش والبالية لي مخبيتها عندها لافام دو ميناج ورا الباب باش مايسرقوهاش الخدامة الآخرين... وأشياء أخرى

#admin_katia